İyülniñ 16-nda Ukrainada devlet tili qanunı işke tüşürildi. Onıñ resmiy neşirde derc etilgeninden eki ay keçti.
«Ukrain tiliniñ devlet tili olaraq işletilmesini temin etüv» qanunı ukrain tiliniñ yerini devlet idaresi, hızmet saası, tasil ve kütleviy haber vastalarında kefil etmekte. O, memurlarnıñ tilni bilmegeninden mesüliyetini belgilemekte. Bu norma qanun qabul etilgeninden üç yıl keçken soñ çalışıp başlaycaq.
Aynı vaqıtta qanun bütün tillerde şahsiy subetlerni sıñırlamay ve milliy azlıqlarnıñ tillerini serbest qullanmağa yasaqlamay, dep bildire ükümet ve parlamentteki müellifleri.
Ukraina Yuqarı Radası aprelniñ 25-nde keçirilgen umumiy toplaşuvda «Ukrain tiliniñ devlet tili olaraq işlevine dair» qanunnı qabul etti. 278 halq deputatı qanunğa rey berdi, 38-i qarşı çıqtı. Bundan evel deputatlar qanunğa kirsetilecek eki biñden ziyade tüzetüvni baqtı.
Ukraina prezidenti mayısnıñ 15-nde ukrain tiliniñ devlet tili olaraq qullanılmasına dair qanunnı imzaladı. Ertesi künü qanun resmiy matbuatta derc etilgen. Ayrı maddelerni almasaq, qanun 2019 senesi iyülniñ 16-nda işke tüşürilecek.
