Ukrainada martnıñ 30-nda «sessizlik künü» başlandı, dep bildire Azatlıq Radiosı.
Prezident saylavları qanunına köre, saylavaldı teşviqat martnıñ 30-nda saat 00:00-da bitmek kerek edi.
«Bu künde bir de bir teşviqat yapılması yasaqlana: em soqaqtaki vatandaşlarnıñ teşviqatı, em kütleviy haber vastaları üzerinden teşviqat», – dep añlattı İç işler naziriniñ mesleatçısı İvan Varçenko.
İç işler nazirligi neşir, audio ve video ve elektron kütleviy haber vastalarında namzetlerniñ siyasiy reklaması, çıqışları, intervyü ve maqaleleri, video levhaları, audio ve videoları ve diger malümatlarını aydınlatmaqtan vazgeçmege çağırdı.
Ukraina prezidentiniñ saylavları martnıñ 31-nje olacaq. Namzet ğalip çıqmaq içün reylerniñ 50 fayızını qazanmalı. Aks alda, aprelniñ 21-nde saylavlarnıñ ekinci turı olacaq, eñ çoq rey qazanğan eki namzet yarışlaşacaq.
