Fevralniñ 16-nda çarşenbe künü Ukrainada ilk sefer yañı devlet bayramı - Rusiyeniñ arbiy telükesi vaziyetinde Birlik künü qayd etile.
Keçenlerde Ukraina ükümeti bu künni qayd etmek içün tedbirler planını tasdıqladı. Bütün memuriy binalar üzerine bayraqlarnıñ asılması, saat 10-da devlet gimni yanğıratılması, aqşam üstü memuriy binalar bayraq renkleri ile aydınlatılması beklenile.
Yañı bayramnıñ qayd etilmesi aqqında Ukraina devlet başı Volodımır Zelenskıy fevralniñ 14-nde ilân etti.
«Bu künü milliy bayraqlarnı asaraq, sarı-mavı şeritler taqıp, birligimizni bütün dünyağa kösterecekmiz», – dep aytı Zelenskıy.
Bazı kütleviy haber vastaları, hususan Spiegel alman neşiri, fevralniñ 16-nı Rusiyeniñ Ukrainağa ücüm etecek künü dep aytqan edi.
ABD ve bir sıra diger memleketniñ resmiy vekilleri bu afta Rusiyeniñ Ukrainağa ücüm etüv ihtimalı büyük, dep bildirgen edi. Aynı vaqıtta qayd etilgenine köre, Rusiye ücüm etmege cesaret etermi alâ daa belli degil. Ğarp memleketleriniñ liderleri diplomatiya yolu ola bile, dep ayta.
Rusiye ücüm planlarını inkâr ete. Rusiye Mudafaa naziri Sergey Şoygu bazarertesi künü prezident Vladimir Putinnen körüşip, şimdi büyük talimler keçirile, amma çoqusı tezden yekünlenecek, dep ayttı.
