Ukrainada oktâbr 10-unda rejissörlar Ahtem Seitablayev ve John Wynn çıqarğan "Zahar Berkut" tarihiy draması numayış etildi. Bu, fimniñ Facebook saifesinde bildirile.
"Zahar Berkut"nıñ vaqiaları 1241-inci yılnı tasvir ete, o zaman Buranday han reberliginde moğol ordusı, öz yolunda er şeyni berbat etip, ukrain Karpatlarğa keldi.
"Karpatlar eteginde ordu toqtandı, amma gece Berkut ağa-qardaşlar, duşmannıñ toqtav yerine gizli kelip, esirlerni azat etti. O zaman han, köyge yolnu kösterecek yerli sakinlerniñ arasından bir hainni tapıp, dağlılardan intiqam alacaq oldı. Amma, aynecilik ve cesaretnen duşmannı yıqmaq içün, dağ ealisiniñ başqa planları bar edi", - denile film tasvirinde.
Baş qaramanlarnıñ birisini amerikan aktör Robert Patrick oynadı.
Müellifler bildirgeni kibi, "Okean Elzı" taqımı, filmniñ esas sound trackiniñ qısmı olğan "Boğaz" ("Preval") türküsini yazdı.
İvan Frankonıñ ikâyesi boyunca çıqarılğan "Zahar Berkut" filminiñ çekişlerinde, Ukraina. AQŞ, Qazahistan, Büyük Britaniya ve Moğolistan aktörları iştirak etti.
Seitablayev, "Haytarma", "Başqasınıñ duası", "Kiborgler" ve başqa filmlerinen belli. Şimdi o "Zahar Berkut" ve Oleğ Sentsovnıñ pyesası esasında "Nomerler" filmleri üzerinde çalışa. Aktör olaraq Seitablayev, 25-ten ziyade film ve seriallarda iştirak etti. Eñ yañısı - Nariman Aliyevniñ "Evge" filminde baş rol, bu film 72-nci Kann halqara kino festivalinde iştirak etti ve 10-uncı Odessa halqara kino festivalinde Gran-pri qazandı.
