Ukrainada fevralniñ 23-nde demokratik şekilde saylanğan ilk Qırım müftisi, Birinci Qırımtatar Milliy Qurultayınıñ reisi, qırımtatar milliy gimniniñ müellifi Noman Çelebicihan añıla.
Bu aqta Ukraina prezidentiniñ Qırım Muhtar Cumhuriyetindeki daimiy temsilciliginiñ Facebook saifesinde haber etile.
Noman Çelebicihan 1918 senesi fevralniñ 23-nde Aqyar apishanesinde bolşevikler tarafından qurşunğa tizilgen edi.
«Bu qurbannen sovet rejimi qırımtatar halqına qarşı bir sıra cinayetni açtı, onıñ eñ yüksek seviyesi ise 1944 senesi facialı sürgünlik oldı. Ve bugün Qırımda Rusiye işğalci akimiyeti qırımtatarlarnı «pek» basqığa oğrata ve taqip ete», – dep aytıla Zelenskıynıñ Qırım Muhtar Cumhuriyetindeki temsilcilik haberinde.
Qırımtatarlar er yıl bu künde hatıra tedbirlerini keçire.
Kyivdeki Yaroslav Mudrıy Milliy kütüphanesinde ukrain ve qırımtatar tarihçıları Noman Çelebicihannıñ ayatı aqqında tarif etecek.
Er yıl olğan «Yardım eli» hayriye aktsiyası keçirilecek, toplanğan para ukrainalı siyasiy mabüslerniñ balalarına yollanılacaq.
Noman Çelebicihan 1885 senesi molla qorantasında dünyağa keldi. Bağçasaray, İstanbul ve Sankt-Peterburgda oqudı, qırımtatar gençleriniñ maarif ve inqilâp teşkilâtlarında iştirak etti.
2018 senesi Çelebicihan öldürilgeniniñ 100 yılında Çerniğiv vilâyetiniñ İgnâ şeerinde hatıra tahtası tiklendi.
