Ukrainada prezident saylavlarınıñ ekinci turı başlandı. Şoumen ve iş adamı Volodımır Zelenskıy ve şimdiki prezidenti Petro Poroşenko prezident olmaq içün yarışmaqta.
Saylav bölükleri saba saat 8-den aqşam 20-ge qadar çalışa. Çetelde rey berüv yerli saatqa köre keçirile.
Ukraina Merkeziy saylav komissiyası saylavlarnıñ neticelerini 2019 senesi mayısnıñ 1-ne qadar ilân etmeli. Yañı saylanğan prezidentniñ inauguratsiyası iyünniñ 3-ne qadar ötkerilmeli.
Ukraina prezidenti saylavları umumiy ola. Saylavlar kününe qadar 18 yaşını toldurğan vatandaşlarnıñ rey bermek aqqı bar. Rey bermek içün saylayıcılarnıñ yanında Ukraina vatandaşlığını isbatlağan vesiqa (pasport, arbiy bilet ve ilâhre) bulunmalı.
Birinci turda Volodımır Zelenskıyge 5 714 034 saylayıcı (30,24%), Petro Poroşenkoğa ise 3 014 609 (15,95%) saylayıcı qoltuttı. Rey berüvde saylayıcılarnıñ 62,8%-ı iştirak etti.
