Ukrainada 90 kün devam etecek prezident saylav kampaniyası başladı. Bu aqta Ukraina Merkeziy saylav komissiyasınıñ qararında aytıla.
Memleketniñ merkeziy saylav komissiyası namzetlerniñ vesiqalarını 2019 senesi fevralniñ 3-ne qadar qabul etecek. Namzetler qayd olğan soñ martnıñ 29-na qadar devam etecek saylavaldı teşviqatına başlay bile.
Prezident saylavları 2019 senesi martnıñ 31-ne belgilengen edi.
Saylavlar bir basamaqta keçse, neticeleri aprelniñ 10-nda çıqarılacaq. Martnıñ 31-nde namzetlerden iç birisi saylayıcılar reyleriniñ 50 fayızını qazanmasa, rey berüvniñ ekinci basamağı aprelniñ 21-nde olacaq. Böyleliknen neticeler mayısnıñ 1-nde ilân etilecek, inauguratsiya ise mayısnıñ 31-ne belgilenecek.
Bundan evel Ukraina prezidenti Petro Poroşenko bildirdi ki, Rusiya istilâsından sebep Ukrainanıñ bir qaç vilâyetinde ilân etilgen cenk vaziyetini uzatmamağa qarar aldı. Onıñ aytqanına köre, o, prezident saylavları 2019 senesi martnıñ 31-nde keçecegini «kesen-kes kefil ete».
