Rusiye Ukrainağa qarşı cenk başlatqanından tahminen 17 biñ arbiyini coydı. Bu aqta martnıñ 28-nde saba Ukraina Silâlı quvetleri Baş ştabı bildirdi.
Bundan ğayrı, Rusiye Federatsiyasınıñ ğayıpları:
- 586 tank,
- 1694 zırhlı maşina,
- 302 top sisteması,
- 95 reaktiv top ateş sisteması,
- 54 ava mudafaa vastası,
- 123 uçaq,
- 127 vertolet,
- 1150 maşina,
- 7 gemi,
- 73 yanıcı-yağlayıcı tsisterna,
- 66 uçucısız uçuş cihazı,
- 21 mahsus tehnika,
- 4 operativ-taktik raketa kompleksiniñ köçürüv tertibatı.
«Malümat teşkerile. Cenk areketleri çoq olğanı içün esaplamaq zor ola», – dep qoştı Baş ştabı.
Martnıñ 25-nde Rusiye Federatsiyası silâlı quvetleriniñ Baş ştabı Ukrainağa qarşı cenk devamında tek ekinci sefer ölgen Rusiye arbiyleri aqqında bildirdi. Bu malümatqa köre, 1351 Rusiye arbiyi öldi, daa 3825 arbiy yaralandı.
NATO esaplarına köre, cenk vaqtında 7 biñden 15 biñge qadar Rusiye arbiyi öldürildi, dep bildirdi Time neşiri martnıñ 24-nde. Yaralanğanlarnen beraber Rusiye arbiyleri arasında qurbanlarnıñ sayısı 30-40 biñ ola bile.
Ukrainada ölgen Rusiye arbiyleriniñ sayısını tasdıqlaycaq mustaqil bir menba şimdilik yoq.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
