Ukrainada qırımtatar siyasetçisi ve faali Nariman Celâl aqqında vesiqalı film çıqaracaqlar. Bunı, filmniñ yaratılmasına qoşulğan "QırımSOS" aq qoruyıcı teşkilâtında haber ettiler.
Qayd etilgeni kibi, filmniñ ğayesi jurnalist Natalya Gümenük ve rejissör Anna Tsigimağa ait. Al-azırda video materialları toplanıla – Celâlğa yaqın olğan ya da onı bilgen türlü adamlar ile intervyü yazıla.
"Bu, icadiy leyhalarnı desteklegenimiz ilk sefer degil - evel "QırımSOS" taqımı qırımtatar halqınıñ milliy lideri, Ukraina millet vekili Mustfa Cemilev aqqında film çıqarğan edi. Nariman Celânıñ da şahsiyetini emiyetli sayamız. Onıñ taqdiri aqqında ikâye etken film siyasiy mabüslerniñ taqdirini hatırlatmaq ve işğal etilgen Qırımda söz serbestligi quymetini köstermek içün yahşı fırsattır", - dedi "Qırım SOS" yolbaşçısı Denis Savçenko.
Film prodüseri Natalya Gümenük, Celâlnıñ tevqif etilmesi keçken yıl işğal etilgen Qırımda yüz bergen esas adiselerden biri olğanını qayd etti.
"İnsanlarnıñ diqqatını çekmekniñ yekâne yolu ikâyeler aytıp bermektir. Seyircilerniñ qaramannıñ yerinde ola bilgen, ailesiniñ ne is etkenini is ete bilgen ikâyeler vastasınen. İşğalciler Meclisni yasaq etken soñ onıñ reberligine Qırımğa barmağa yasaq olğanını añlamaq kerek. İşğal şaraitinde yekâne qırımtatar siyasetçisi olaraq qalmaq ve bunıñnen bağlı olmaq mesüliyeti bu olduqça genç kişiniñ omuzlarına tüşti", - dedi Gümenük.
Rejissör Anna Tsıgima Gümenük ile işğal şaraitindeki yaşayışqa bağışlanğan artıq üç film üzerinde çalışqan edi. Bu siyasiy mabüsler Oleg Senyov ve Öleksandr Kölçenko ve qırımtatarlarnıñ sürgünlikten avdeti aqqında filmler edi.
Ukraina Nazirler kabineti Ukraina devlet başı Volodımır Zelenskıynıñ işğal etilgen Qırımda "gaz borusında diversiyada" qabaatlanıp tutulğan qırımtatar siyasetçisi ve faali Nariman Celâlğa Levko Lukyanenko adına devlet stipendiyasınıñ tayin etilmesi aqqında fermanını tasdıqladı.
