Ukrainada Center for Civil Liberties/Vatandaş azatlıqları merkezi Euromaidan Press ile birlikte #LetMyPeopleGo kampaniya çerçivesinde Kreml mabüsleri içün ananeviy olğan Mektüpler qış marafonını başlay.
"Çoqumız qış tatillerini sıcaqta, raat ve ailelerimiz ile qarşılaycaq. Kremlniñ ukrain siyasiy mabüsleri - konvoy, şingen şorba, ceza kamerası ile, Vatanda unutılğan... Unutılmağan? Biz mabüslerge olarnı unutmağanımıznı köstere ve olarnıñ Yañı yılını biraz sıcaqça yapa bilemiz", - dep yazıla bildirmede.
Qayd etile ki, al-azırda eñ azından 127 ukrain Rusiye apishanelerinde ve ilhaq etilgen Qırımda ve 200-ge yaqın işğal etilgen Donbas topraqlarından tutula.
"Olarnıñ arasında türlü adamlar - iş adamı Valentin Vıgovskiy, aq qoruyıcı Server Mustafayev, vatandaş jurnalisti Seyran Saliyev, oca Natalya Şilo, ekim Natalya Stetsenko, çalğıcı Valeriy Matüşenko, nefaqacı Vitaliy Atamançıq ve digerleri", - dep qayd eteler aq qoruyıcılar.
Metüplerniñ Rusiye apishanesi tarafından qabul etilmesi içün böyle qaidelerge riayet etmek kerek:
-rus tilinde yazmaq;
-siyasiy bitaraflıqqa riayet etmek;
-zarf üstünde mektüpni alacaq olğannıñ adını, soyadını ve babasınıñ adını, doğğan yılını yazmaq kerek .
"İşğal etilgen Donbas ya da Qırımda bulunğan adamğa mektüp yazmağa qarar etseñiz, rica etemiz Vatandaş azatlıqlar merkeziniñ adresini yazıñız: 01024 Kyiv, Basseynaya 9-G, of.25, abonent qutusı 10. Adresatlarğa bermege imkân olmasa, olarnı iç olmağanda tuvğanları alır. Kimge yazmağa bilmeseñiz de Vatandaş azatlıqları merkezine yazıñız. Olarnı eñ az mektüp alğan siyasiy mabsülerge berirmiz", - dep qayd etile bildirmede.
Marafon yanvarnıñ soñunace devam etecek.
