Ukrainada (ilhaq etilgen Qırım ve Aqyarnıñ, em de işğal etilgen Donbassnı saymazdan) yünevin 1592 yañı COVID-19 adisesi qayd etildi, bu nevbetteki antirekorddır. Bunı Ukraina milliy havfsızlıq ve mudafaa şurasınıñ malümatyı köstere, dep yaza Azatlıq Radiosı.
22 adam vefat etti, 530 adam yahşı oldı.
Umumen avgustnıñ 13-üne qadar Ukrainada 86 140 koronavirus hastası qayd etildi. COVID-19-dan 1 992 adam vefat etti, 46 000 adam tedaviylendi.
Avgustnıñ 13-üne qadar dünyada 20,5 milliondan çoq adam koronavirusnen hastalandı. 748 416 adam vefat etti, 12,7 million yahşı oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
