Ukraina Nazirler şurası karantinni mayısnıñ 11-ne qadar uzattı, dep bildirdi baş naziri Denıs Şmığal aprelniñ 22-nde ükümet toplaşuvında, dep haber ete Azatlıq Radiosı.
Onıñ aytqanına köre, Ukraina milliy ilimler akademiyası ve Sağlıq nazirliginiñ esapları Ukrainada hastalıq zirvesi daa olmadı, dep köstere.
«Buña esaslanıp, ükümet bugün karantinni mayısnıñ 11-ne qadar uzatmağa qarar alacaq, çünki İlimler akademiyasınıñ esaplarına köre mayısnıñ 3-ü 8-i arasında zirve olacağını bekleymiz», – dep añlattı Şmığal.
Onıñ bildirgenine koyer, ükümetniñ karantinden çıquv planı bar, epidemiologik vaziyet eyileşken soñ onı birden yerine ketirip başlaycaqlar. Şimdi Nazirler şurasınıñ tahminleri böyle vaziyet mayısnıñ 11-nden evel böyle vaziyet olmaycağını köstere.
Martnıñ 12-nde Ukrainada koronavirus yuqunçı qırğınlığı sebebinden ve onıñ tarqaluvına yol bermemek içün oquv yurtlarında karantin başlandı. Martnıñ 17-nden berli eglence ve cemaat aşağan yerleriniñ (aş çıqarılğan yerler istisna ola) işi yasaqlana, naqliyat areketi sıñırlana. Azıq malları, turmuş malları tükânları ve aphaneler çalışa.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
Karantin aprelniñ 3-ne qadar devam etecek edi, amma ükümet onı daa üç aftağa – aprelniñ 24-ne qadar uzatqan edi.
