Ukrainada ilk COVID-19 koronavirus hastası qayd etildi, dep bildirdi sağlıq naziriniñ muavini Viktor Lâşko, dep haber ete Azatlıq Radiosı.
«İnsannıñ sıcağı normal edi, Ukraina devlet sıñır noqtasından Çernovtsı vilâyetine qayttı. Çernovtsı vilâyetinde qoşma sıcaqlıq teşkerüvi yapıldı, suallerge cevap berdi ve özüni tecrit etti, çünki insan COVID-19 hastaları olğan memleketlerge seyaat etti. Seyaat etken qoranta – erkek ve qadın – özüni tecrit etti. Eki künden soñ ise koronavirus yuqunçı peyda olğanını köstergen alâmetler köründi», – dedi Lâşko.
Onıñ bildirgenine köre, hasta aile ekimine mesleat içün muracaat etti. Fevralniñ 29-nda aqşam yuqunç hastahanede mesleat berilmesini talap etken şikâyetleri bar edi: anda onı «acele yardımnıñ» mahsus taqımı alıp ketti.
«Tünevin altı şübheli hastamız bar dedim. Bugün bu şübhe tek bir insanda tasdıqlandı. Bu malümat ve örnekler Dünya sağlıq teşkilâtınıñ virus laboratoriyasına yollanıldı. Adise Ukrainada qayd etildi, bu insannen temasta olğan şahıslarnen çalışıp başladıq. Yerli qırğınlıqçılar episini bile», – dedi Lâşko.
Nazir muavininiñ qayd etkenine köre, «ekstremal bir şey olmadı».
«Adiy rejimde çalışamız. Bir-eki koronavirus yuqunçına oğrağan kişi qayd etilgen qırğınlıq seviyesinde bulunamız. Areket algoritmimiz bar, memleket içinde ve belli memuriy yer – rayon, şeer, vilâyet tışına tarqalsa, ne yapacağımız belli», – dep qayd etti memur.
O, insanlarnı tibbiy maska qullanmamalarına çağırdı, çünki «qoruv yañlış yapıla ve semereli profilaktika usullarını qullanmağa imkân bermey».
Nazir muavini, qollarnı sıq-sıq yuvıp, antiseptik qullanmaq ve keskin nefes virus yuqunçı alâmetleri olğan insanlarnen temasta bulunmamaq kerek, dep hatırlattı.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
