Qırımtatar Milliy Meclisiniñ reisi Refat Çubarovnıñ bildirgenine köre, noyabrniñ 22-nde saba Kyiv ava limanında Suriye lagerlerinden Ukrainağa qaytqan daa üç qorantanı qarşıladılar. Onıñ malümatına köre, üç qadın ve 11 bala qaytarıldı.
«Suriyede bu yıl oktâbr ayında Al-Holdan ukrainalı qorantalar avuştırılğan «Roc» lagerinden tahliye etilüvini beklegen daa 7 qadın ve 12 bala qala. Bu Ukraina vatandaşlarınıñ tahliye etilüvine alâqası olğan er kes sağ olsun – Ukraina Tış işler nazirligi, Prezident ofisi, Ukraina Mudafaa nazirligi, Ukraina mahsus hızmetleri ve digerleri. Belâğa oğrağan Ukraina vatandaşlarını qurtarmaq içün bütün mehanizmlerni qullanğanlarğa ayrı teşekkürler», – dep yazdı Çubarov Facebookta.
Ukraina müessiseleri qadın ve balalarnıñ Suriyeden tahliye etilüvi aqqında daa malümatını derc etmedi.
İyün ayında Qırım.Aqiqat, sekiz Ukraina vatandaşı – qırımlı Amina ve 2019 senesinden berli Suriyeniñ şarqiy şimalinde «Roc» qapalı lagerinde olğan yedi balası – Suriyeden Ukrainağa qayttı, dep bildirdi.
Tahliyeni Baş istihbarat idaresi tarafından Ukraina Tış işler nazirliginiñ işbirliginde, Ukraina Prezidentiniñ istihbarat meseleleri komitetiniñ yardımınen, tahliye içün tranzit koridorını temin etken Iraq Kürdistanınıñ ükümeti yardımınen teşkil etildi.
Bu, ukrainalılarnıñ Suriyeden tahliye etilüviniñ ekinci basamağı oldı: 2020 senesi dekabr ayında Ukrainanıñ doquz vatandaşı qaytarılğan ilk etap oldı.
Aprel ayında Human Rights Watch bildirgenine köre, Suriye regional akimiyeti tahminen 40 ukrainalı qadın ve balanı qaçaqlar lagerinde qanunsız tuta. Aq qorçalayıcılarnıñ malümatına köre, Ukraina vatandaşları Suriye akimiyeti «İslâm devleti» ekstremist gruppirovkası ile alâqalarında şübheli sayıp tutqan 43 biñ çetel adamı sırasına kire.
