Ukrainada laboratoriyada tasdıqlanğan COVID-19 hastalarınıñ sayısı (işğal etilgen Qırım ve Aqyar, işğal etilgen Donbas topraqları sayılmay) aprelniñ 13-ne qadar 3102-ge arttı, 201-i bala ve 530-ı tibbiyet hadimi ola, dep ayttı saba brifinginde sağlıq naziri Maksım Stepanov, dep haber ete Azatlıq Radiosı.
Sağlıq naziriniñ aytqanına köre, bir künde 325 yañı hasta qayd etildi.
«325 insannıñ diagnoza laboratoriyada tasdıqlandı, olardan 12-si bala ola. 85 tibbiyet hadimi de bar. 77 insan hastahanege alındı, bir bala ve yedi tibbiyet hadimi. Üç insan aqcigerlerni suniy avalandıruv cihazına bağlandı. Sekiz kişi tüzeldi, bir bala, dört tibbiyet hadimi. Vefat etken 10 kişi aqqında haber etile», – dedi Stepanov.
Onıñ bildirgenine köre, ölgenlerniñ ekseriyeti – esli-başlı ya da hastalıqları olğan insanlardır.
Stepanovnıñ qayd etkenine köre, Ukrainada test yapuv tertibi deñişken soñ laborator tedqiqleriniñ sayısı artıp, künde 2,5-3 biñ ola.
Ukraina Sağlıq nazirliginiñ yañı malümatına köre, memlekette vefat etkenlerniñ sayısı 93-ke arttı, 97 insan tüzeldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
