Ukrainada martnıñ 20-nde saat 23:00-da COVID-19 koronavirus yuqunçınen hastalanğanlarnıñ tasdıqlanğan resmiy sayısı 41-ge arttı. Bu aqta Ukraina sağlıq nazirligi bildirdi, dep haber ete Azatlıq Radiosı.
«Yañı hastalar Kyiv (1) ve Ternopil vilâyetlerinde qayd etildi», – dep bildire nazirlik.
Bundan evel Sağlıq nazirligi ve Cemaat sağlığı merkeziniñ malümatları farqlı edi: nazirlik martnıñ 20-nde saat 22:00-da 39 hasta, Cemaat sağlığı merkezi ise 40 hasta bar, dep bildirdi.
Martnıñ 20-nde hastalıqnıñ tarqaluvı sebebinden Nazirler Şurası Kyivde, Dnipropetrivsk ve İvano-Frankivsk vilâyetlerinde fevqulâde vaziyetni ilân etti. Şimdilik Ukrainada koronavirustan ölgen üç insan aqqında haber etildi. Bir kişi tüzeldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
