Ukrainada (işğal altındaki Qırım ve Aqyar, Donbasnıñ işğal etilgen topraqları esaplanmay) keçken künü 5297 yañı koronavirus hastası qayd etildi, dep aytıla Milliy telükesizlik ve mudafaa şurasınıñ monitoring sistema malümatında, dep haber ete Azatlıq Radiosı.
Bu malümatqa köre, soñki künde 93 kişi vefat etti, 2263 insan tüzeldi. Eñ çoq yañı hasta Harkiv vilâyetinde (576), Kyivde (422) ve Odesa vilâyetinde (367) qayd etildi.
Pandemiya başlağanından Ukrainada 244 biñden çoq insan COVID-19-ğa oğradı, 4690 kişi vefat etti. Sağlıq naziri Maksım Stepanov COVID-19 koronavirus hastalığınıñ tarqaluvı ile vaziyet kerginleşse, daa sert karantinge qayta bileler, dep bildirdi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
