Keçken künü, sentâbrniñ 25-nde, Ukrainada 3833 yañı COVID-19 hastası qayd etildi – pandemiya başlağanından rekord oldı. Bu aqta Milliy telükesizlik ve mudafaa şurasınıñ epidemiya tarqaluvınıñ monitoring sistemasınıñ malümatında aytıla, dep haber ete Azatlıq Radiosı.
Keçken künü 1740 hasta tüzeldi, 76 kişi vefat etti.
Eñ çoq yañı hasta Kyivde (447), Harkiv (380) ve Ternopil (284) vilâyetlerinde qayd etildi.
Umumen sentâbrniñ 26-na qadar Ukrainada 195 504 COVID-19 hastası qayd etildi, 3903 kişi vefat etti, 86 873 insan tüzeldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
