Ukrainada bir künde, fevralniñ 19-nda, 6295 yañı COVID-19 hastası (işğal etilgen Qırım ve Aqyar ve Donetsk ve Lugansk vilâyetleriniñ ayrı rayonları sayılmay – QA) qayd etildi.
Bu aqta Ukraina sağlıq naziri Maksim Stepanov Facebook saifesinde bildirdi.
Keçken künü 2225 insan hastahanege alındı, 4539 insan tüzeldi, 73 kişi vefat etti, dep haber ete Azatlıq Radiosı.
Fevralniñ 19-nda Ukrainada 61071 test yapıldı.
Bir künde eñ çoq hasta İvano-Frankivsk (738), Vinnıtsâ (554), Çernivtsi (522), Lviv (420) vilâyetlerinde ve Kyivde (415) qayd etildi.
Pandemiya vaqtında Ukrainada aman-aman 1,3 mln insan hastalandı, 1,14 mln yahşı oldı, 25045 kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
