Keçken künü, oktâbrniñ 11-nde, Ukrainada 4420 yañı COVID-19 hastası qayd etildi. Bu aqta Ukraina Milliy telükesizlik ve mudafaa şurasınıñ malümatında aytıla.
Bir künde 43 kişi vefat etti, 903 insan tüzeldi, dep haber ete Azatlıq Radiosı.
Eñ çoq yañı hasta Harkiv (741) ve Sumı (418) vilâyetlerinde qayd etildi.
Oktâbrniñ 11-i sabasına qadar Ukrainada 265500 COVID-19 hastası qayd etildi. 5015 kişi vefat etti, 114410 insan tüzeldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
