Ukraina mustaqilliginiñ yılları içinde ilk sefer memlekette azğariy aylıq miqdarı dollar qarşılığında Rusiye ve Beyazrusiye azğariy aylığından yüksek oldı, dep bildirdi Ukraina iqtisadiyat inkişafı, ticaret ve köy hocalığı naziriniñ muavini Sergey Mıkolayçuk Facebook saifesinde.
«Çoq yıllar içinde ilk sefer Ukrainada azğariy aylıq miqdarı Rusiye ve Beyazrusiyedekinden yüksek oldı. Böylece, yanvarniñ 1-nden itibaren Ukrainada azğariy aylıq 4 biñ 723 ğrıvnâ oldı, ya da yılnıñ başında olğan kursqa köre 199 dollar oldı», – dep yazdı Mıkolayçuk.
Böylece, Ukrainada 2020 senesi yanvarniñ 1-nden itibaren azğariy aylıq miqdarı – 4723 ğrıvnâ, Rusiyede – 12130 ruble, Ukraina Milliy bankı ve Rusiye Merkeziy bankınıñ resmiy kurslarına köre yanvarniñ 1-nde bu 199,4 dollar ve 195,9 dollar ola.
Aynı vaqıtta Beyazrusiyede – 375 ruble. Beyazrusiye ile farq (2020 senesi yanvarniñ 1-nden itibaren azğariy aylıq – 177,74 dollar) aman-aman 22 dollar ola.
