Ukrainada aprelniñ 1-nde aqşam 794 COVID-19 koronavirus hastası (vaqtınca işğal etilgen topraqlar sayılmay) qayd etildi. Bu aqta Azatlıq Radiosı bildire.
«Umumen Ukrainada COVID-19 hastalığından 20 kişi vefat etti. Umumen 13 insan endi tüzeldi. Tekrar yapılğan laborator tedqiqi virusnı tapmadı», – dep aytıla haberde.
Aprelniñ 1-nde saba Ukrainada 669 COVID-19 hastası bar, dep haber etilgen edi.
Dünyada aprelniñ 1-ne qadar 911 biñden çoq COVID-19 hastası qayd etildi, 45 407 insan vefat etti, 191 biñden çoq tüzeldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
