Ukrainada (işğal etilgen Qırım ve Aqyar, Donbasnıñ işğal altındaki topraqları sayılmay – QA) 260 bala ve 684 tibbiyet hadimi koronavirusnen hastalandı, dep bildirdi sağlıq naziri Maksım Stepanov, dep haber ete «Nastoyaşçeye Vremâ».
«Soñki künde 392 yañı COVID-19 hastamız bar, umumen 3764 insan, olardan 260-ı bala ve 684 tibbiyet hadimi, hastalandı», – dep tarif etti nazir.
COVID-19 hastalığına oğrağan 3764 insandan 108-i vefat etti, 143 ukrainalı tüzeldi.
Dünyada koronavirus hastalarınıñ sayısı 2 million 12 biñ 69 insan oldı. Hasta sayısına köre birinci yerde ABD buluna – 614 246 kişi. Ekinci yerde İspaniyada – anda 177 633 kişi bar, üçünci yerde İtaliya – 162 488 hasta.
Daa evel Dünya sağlıq teşkilâtı dünyada koronavirus hastalığınıñ zirvesi daa olmadı, dep bildirdi, çünki bazı memleketlerde qırğınlıq vaziyeti eyilişe, başqalarında ise fenalaşa.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
