Ukrainada aprelniñ 26-na qadar 8617 COVID-19 hastası qayd etildi. Bu aqta Cemaat sağlığı merkezi bildirdi. Aprelniñ 25-nde 492 yañı hasta qayd etildi, dep haber ete Azatlıq Radiosı.
Ukrainada 89 biñ koronavirus testi yapıldı.
Eñ çoq hasta Çernivtsi vilâyetinde (1341) ve Kyivde (1188) qayd etildi.
«5867 hasta hastahanede tedaviylene, 471-i bala ve 1391-i tibbiyet hadimidir. Umumen 2750 insan hastahanege alındı, 115-i bala ve 284-ü tibbiye hadimi ola. 107 insan aqcigerlerni suniy avalandıruv cihazına bağlandı», – dep aytıla haberde.
COVID-19 hastalığından 209 insan (108 erkek ve 101 qadın) vefat etti, 840 kişi tüzelip hasta oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
