Fevralniñ 24-nden berli Ukrainada cenk vaqtında 7000-den çoq Rusiye arbiyi elâk oldı, dep haber ete The New York Times Amerika istihbaratınıñ «gizli malümatına» esaslanıp. Bu 20 yıl devamında Iraq ve Afğanistanda öldürilgen Amerika askerleriniñ sayısından daa çoq.
NYT malümatına köre, 14 biñden 21 biñge qadar Rusiye askeri yaralandı. Rusiye tarafından cenkte 150 biñden çoq asker iştirak ete.
Bu malümatnıñ tam olmaması mümkün: neşir menbalarınıñ bildirgenine köre, olar kütleviy haber vastalarınıñ malümatı, resmiy taraflarnıñ raqamları, yoldaş resimleri ve Rusiye ordu ateşleriniñ videolarına esaslana.
NYT Pentagondaki gizli menbalarınıñ fikirince, artqan ölü sayısı Rusiye ordusınıñ küçüne tesir ete bile.
Rusiye Mudafaa nazirligi Rusiye ordusından vefat etkenlernen bağlı malümatnı tek bir kere, martnıñ 2-nde, seslendirdi. Müessise malümatına köre, Ukrainada 498 Rusiye arbiyi elâk oldı, daa 1597 kişi yaralandı.
Ukraina akimiyetiniñ fikirince, Rusiye ordusından daa çoq insan elâk oldı ve olarnıñ sayısı 13,8 biñ ola bile. Bu raqamda yaralanğan ve esir alınğanlar barmı aytılmay. Ukraina akimiyeti cenk vaqtında elâk olğan dört Rusiye generalı aqqında da bildire. Rusiye bu malümatnı tasdıqlamamdı.
Ukraina prezidenti Volodımır Zelenskıy da Rusiye ordusı silâlı ücümini başlatqanından berli memleketniñ silâlı quvetleriniñ ğayıplarını seslendirdi. Onıñ aytqanına köre, fevralniñ 24-nden berdi 1300 Ukraina arbiyi elâk oldı.
Zıddiyet taraflarınıñ resmiy vekilleri bergen malümat ne qadar doğru olğanını teşkermek imkânsız ola.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
