Martnıñ 29-ı sabasına qadar Ukrainada laboratoriyada tasdıqlanğan 418 COVID-19 koronavirus yuqunçı hastası qayd etildi, olardan doquzı can berdi, beş hasta tüzeldi, dep bildire Ukraina Sağlıq nazirliginiñ matbuat hızmeti.
«Bir kün içinde 109 yañı koronavirus yuqunçı tedqiqi müsbet çıqtı», – dep qayd etti müessise, dep haber ete Azatlıq Radiosı.
Qayd etilgenine köre, Ukrainada bir hasta bile qayd etilmegen yekâne vilâyet Mıkolayıv ola. Hastalarnıñ sayısına köre Kyiv lider ola, anda COVID-19 82 insanda tasdıqlandı. Çernivtsi vilâyetinde 59 hasta, Ternopil vilâyetinde 57, Çerkası vilâyetinde 46, Kyiv vilâyetinde 45, İvano-Frankivsk vilâyetinde 41, Vinnıtsâ vilâyetinde 22, Zaporijjâ vilâyetinde 11 hasta qayd etildi. Qalğan vilâyetlerde 10-ğa qadar koronavirus hastası bar.
Johns Hopkins universiteti yanındaki sistematik tedqiqatlar merkeziniñ malümatına köre, martnıñ 29-ı saba dünyada qayd etilgen koronavirus hastalarınıñ sayısı 665000 oldı, 30857 insan COVID-19 hastalığından öldi, aman-aman 142000 kişi tüzeldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
