Martnıñ 12-si sabası itibarınen Ukrainada 38 237 adam koronavirusqa qarşı aşılanda, dep haber ete Azatlıq Radiosı.
«Ukrainada martnıñ 11-nde bir künde 8859 adam COVID-19ğa qarşı aşılandı, aşılama kampaniyasınıñ başlanğanından berli ise 38 237 adam. Bir künde eñ çoq aşılama (950) Kyiv vilâyetinde yapıldı», – dep haber ettiler idarede.
Sağlıq saqlav nazirliginiñ malümatına köre, aşılama kampaniyasınıñ başlanğanından berli eñ çoq aşı Donetsk vilâtetinde (4114) ve eñ az Çernigiv vilâyetinde (626) yapılğan.
Fevralnıñ 24-nde Ukrainada tam şekilde koronavirus uqunçına qarşı aşılama kampaniyası başlandı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
