Ukrainada 266 yañı koronavirus hastası qayd etildi, dep bildire Ukraina Sağlıq nazirligi.
Aprelniñ 12-si sabasına qadar 2777 COVID-19 hastası qayd etildi. 89 hasta tüzeldi, 83 hasta vefat etti, dep bildire Azatlıq Radiosı.
Nazirlik qayd etkenine köre, işğal etilgen Qırım ve Aqyar malümatı yoq.
Johns Hopkins Universiteti yanındaki Sistem tedqiqleri merkeziniñ malümatına köre, dünyada 1 777666 koronavirus hastası qayd etildi. 404372 insan tüzelip yahşı oldı, 108867 hasta vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
