Ukrainada 224 COVID-19 yañı koronavirus hastası qayd etildi, dep haber ete Azatlıq Radiosı Sağlıq nazirliginiñ Cemaat sağlığı merkeziniñ malümatına köre.
Ukrainada (işğal etilgen Qırım ve Aqyar ve Donbasnıñ işğal etilgen topraqları sayılmay) 1892 koronavirus hastası tasdıqlandı.
Eñ çoq hasta – Çernivtsi vilâyetinde (302), Kyivde (300) ve İvano-Frankivskte (218). Mıkolayıv vilâyetinde bir hasta bile qayd etilmedi.
Johns Hopkins universiteti yanındaki Sistem tedqiqleri merkeziniñ malümatına köre, dünyada bir buçuq million COVID-19 hastası qayd etildi, 88538 insan vefat etti, 329 876 tüzeldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
