Vaqtınca işğal etilgen Ukraina topraqlarınıñ 800 biñden çoq sakini Ukraina biometrik pasportlarını aldı, dep bildirdi Ukrainanıñ vaqtınca işğal etilgen topraqlarınıñ reintegratsiya ve memleket içinde köçip kelgen insanlarnıñ meseleleri naziriniñ muavini Snaver Seythalilev «Dom» telekanalına bildirdi, dep haber ete «Nastoyaşçeye Vremâ».
«Böyle statistika bar, Devlet migratsion hızmetinden malümatnı muntazam sürette yañartamız. Biometrik pasport alğan ve vaqtınca işğal etilgen topraqta qayd olğan Qırımdan ve şarqtan 800 biñden çoq vatandaşımız aqqında ayta bilemiz. Bu soñki beş yılnıñ malümatı», – dep tarif etti o.
Ukraina prezidentiniñ Qırımdaki temsilcigi aq qorçalayıcı teşkilâtlarnen beraber Telegramda CrimeaIsUAbot çat-botunı açtı. O, Ukraina vatandaşınıñ pasportını, işğal etilgen topraqta doğuv ve ölüm şeadetnamesini resmiyleştirüv, kiriş ve çıqış kontrol noqtalarını keçüv aqqında yañı malümat almağa imkân bere.
Rusiye akimiyeti Kyiv kontrol etmegen topraqlarda 600 biñden çoq Rusiye pasportını berdi, şimdi SNİLS berip başladı. Ukraina prezidenti Volodımır Zelenskıy Donbas sakinlerine berilgen pasportlarnı «ilhaqqa doğru ilk adım» dep adlandırdı.
Mayısta Bloombergniñ yazğanına köre, Avropa Birligi, Rusiye Şarqiy Ukrainanıñ qısımlarını «yavaş-yavaş yutmağa» tırışa, dep tüşüne. Neşir, Brüsselniñ AB aza devletlerine bergen vesiqağa esaslandı. Anda Donbasta teşkil etilgen saylavlar ve «DNR» ve «LNR» sakinlerine berilgen Rusiye pasportları kibi areketler «Ukraina ükümeti kontrol etmegen topraqlarnıñ Rusiyege integratsiyası» içün yapıla, dep aytıldı.
