Yuqarı Rada Ukraina halq deputatlarınıñ toqunılmazlığını sıñırladı. İşbu qararğa 373 halq deputatı qoltuttı, dep haber ete Azatlıq Radiosı.
Deputat toqunılmazlığına dair qanun leyhası keçken çağırılış parlamentte beşinci prezident Petro Poroşenko tarafından qayd etilgen edi. O, parlament azalarınıñ deputat toqunılmazlığını kefil etken ve Yuqarı Radanıñ razılığı olmağanda cinaiy mesüliyetke çekilmesini imkânsız yapqan Ukraina Anayasasınıñ 80-inci maddesini alıp taşlamağa teklif ete.
Ukraina Anayasa mahkemesi 2018 senesi iyün ayında bu qanun leyhasını Anayasağa uyğun olaraq tanıdı.
Aynı vaqıtta Anayasa halq deputatlarınıñ rey berüv neticeleri ya da parlament ve onıñ organlarında aytılğanlardan uquqiy mesüliyet taşımağanını kefil ete. Aqaretlev ya da iftira istisna ola.
Qanun 2020 senesi yanvarniñ 1-nde işke tüşürilecek, dep haber ete «Nastoyaşçeye vremâ». Bu Ukraina prezidenti Volodımır Zelenskıynıñ saylavaldı programmasında ve «Sluğa narodu» firqasınıñ programmasında esas noqtalardan biri edi: prezidentniñ vade etkenine köre, deputatlar qanun bozsa ya da habarcılıqta qabaatlansa, qanun cinaiy işni daa qolay açmağa imkân berir.
«İlimimizniñ alı fena, dep aytalar. Yañlış, çünki Ukraina deputatları kerçekten büyük keşif yapqanlar: olar siyasiy ayatnıñ daimiy areketçisini işlep çıqarğanlar. Pek qolay çalışa: başta deputat namzetleri toqunılmazlıqnı alıp taşlamağa vade ete, soñra rey bermey, daa soñra halq unuta. Kelecek saylavlarda namzetlerniñ vade etecek şeyleri bar. Soñki 20 yıldan berli öyle ola. Amma bu gacetniñ tarih çöplügine ketecek vaqtı keldi», – dep ayttı Zelenskıy sentâbrniñ 3-nde Radada çıqışta bulunıp.
