Qırımtatar Milliy Meclisi, Fastiv meriyası ile birlikte, Ukraina şeerleri birleşmesiniñ reberligine, bölge merkezlerinde şeer şuralarınıñ binalarında devlet bayrağı yanında qırımtatar bayrağınıñ da köterüvi teşebbüsinen muracaatnı yolladı.
Bunı iyün 26-sında, Qırımtatar Milliy Bayraq kününde yapmağa teklif eteler, dep bildirdi Milliy meclis reisi Refat Çubarov.
"Qırımtatar Milliy Meclisi ve Fastiv şeeriniñ meriyasınıñ umumiy mektübinde, Qırım Muhtar Cumhuriyeti ve Aqyar şeeri üzerinde Ukraina suvereniteti ğayrıdan tiklenmegence qırımtatar milliy bayrağını tüşürmemege teklif etile", - yazdı Çubarov Facebookta.
Hatırlatayıq, 2019 yılda Kyivde sergi açılışı, avtoyürüş, bala resimleri yarışı, spikerlerniñ çıqışları, Hreşçatıkta tantanalı yürüş, Mustaqillik Meydanında miting ve diger tedbirler oldı.
İyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın renkli tamğa tasvir etilgen kök renkli bir bayraqtır.
Qırımda, esas Ukrainada ve dünyanıñ diger memleketlerinde bayram tedbirleriniñ keçirilmesi planlaştırıla.
