Ukraina baş nazir muavini, Muvaqqat işğal etilgen topraqlarnıñ reintegratsiya naziri İrina Vereşçuk martnıñ 9-nda Rusiye tarafı ile altı grajdan tahliye marşrutınıñ kelişilüvi aqqında haber etti. Bunıñ aqqında malümat Qızıl Haç Halqara komitetine berildi.
Onıñ sözlerine köre, añlaşmalarğa köre, arbiyler bugün saba saat 9-dan aqşam saat 9-ğace ateşni toqtatmaq kerekler. Gumanatar koridorlar bu yönelişlerde açılacaq:
• Energodar – Zaporojjâ
• Sumı – Poltava
• Mariupolden (Donetsk vilâyeti) – Zaporojjâğa
• Volnovahadan (Donetsk vilâyeti) – Pokrovskqa
• İzümden (Harkiv vilâyeti) –Lozovayağa (Harkiv vilâyeti)
• Kyiv vilâyeti – Vorzel, Buça, Borodânka, İrpen, Gostomel şeerlerinden –Stoyanka, Belogorodkadan Kyivge.
"Rusiye Federatsiyasına muracaat etem: siz martnıñ 9-nda saba saat 9-dan aqşam saat 9-ğa qadar resmiy şekilde ateşni toqtatmağa söz berdiñiz. Mariupol ve Volnovahada olğanı kibi, atta üstüne alınğan mecburiyetlerniñ yerine ketirilmemesi ile bağlı menfiy tecribemiz bar endi", - dedi Vereşçuk.
O, Vorzelden 55 bala ve 26 hadimniñ bulunğan Bebeyler evi tahliye etilecegini qayd etti.
Keçenlerde Sumı ve İrpenden adamlar tahliye etildi.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete. Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
