Ukraina ve Rusiye eyyetleri arasında muzakerelerniñ üçünci raundı martnıñ 7-nde saat 16.00-da başlamalı. Bu aqta Ukraina prezidenti ofisiniñ yolbaşçı mesleatçısı Mıhaylo Podolâk bildirdi.
«Rusiye Federatsiyası ile muzakereler. Üçünci raund. Kyiv saatınen 16:00-da başlanacaq. Eyyet deñişmedi», – dep yazdı o, Twitterde.
Muzakerelerniñ eki evelki raundı fevralniñ 28-nde ve martnıñ 3-nde ötkerildi. Ekincisi vaqtında Ukraina eyyeti Rusiye arbiyleri ateş açqan şeerlerden insanlarnı tahliye etmek içün gumanitar ayatlarnı teşkil etmek añlaşmaları aqqında bildirdi.
İlân etilgen niyetlerge baqmadan, Rusiye ordusı ilân etilgen «sessizlik» vaqtında ateş açmağa devam etip, Ukraina tarafını añlaşmalarnı bozğanında qabaatladı.
Ukraina prezidenti Volodımır Zelenskıynıñ ofisi muzakereler başlamazdan evel Kyiv ateşniñ bütünley toqtatıluvı ve Rusiye ordusınıñ Ukrainadan çıqarıluvı içün israr etecek, dep bildirdi.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete. Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
