Rusiye ve Ukrainada tutulğan vatandaşlar aynı vaqıtta azat etilecek, amma ne vaqıt – belli degil, dep ayttı «Dom» telekanalınıñ yayınında Ukraina halq deputatı Rustem Umerov.
Onıñ aytqanına köre, deñişim muzakereleri devam ete.
«Ne yazıq ki, muzakere esnası tek Prezident ofisi, Ukraina telükesizlik hızmeti ve Ukraina prezidentiniñ Qırım Muhtar Cumhuriyetindeki vekâletlisi vastasınen keçirile, biz ise cedveller nasıl tizilgenini bilmeymiz. Lâkin bu meseleni kün tertibinde köteremiz, dep ayta bilem. Bu deñişüv olacağını bilemmi? Ebet, olacaq. Qırımlı siyasiy mabüsler kirsetildimi? Haberim olmağanı içün cevap berip olamayım», – dedi Umerov.
Avgustnıñ başında Ukraina prezidenti ofisiniñ yolbaşçısı Andriy Yermak «100-ge 100» formatında yañı deñişüv azırlanıla, dep bildirdi. Yermak, deñişüv «tezden» olacaq dep ümüt etkenini bildirdi, amma tam kününi aytmadı.
Onıñ aytqanına köre, Ukraina prezidenti Volodımır Zelenskıy Rusiye prezidenti Vladimir Putinnen kerçekleştirgen soñ subetinde 22 qırımtatarınıñ işğal etilgen Qırımdan azat etilüvini muzakere etmege teklif etti.
Advokat Nikolay Polozovnıñ Qırım.Aqiqatqa bildirgenine köre, Rusiyede ve işğali altındaki Qırımda mahküm etilgen Ukraina vatandaşlarınıñ advokatları ve tuvğanları olarnı azat etüv meselesinde ilerilev körmey. Polozovnıñ malümatına köre, al-azırla 130-dan çoq Ukraina vatandaşı Rusiyede ya da Qırımda tutula.
Ukraina Yuqarı Radasınıñ insan aqları vekâletlisiniñ ofisi bildirgenine köre, 2020 senesi noyabr ayında 130 Ukraina vatandaşı Rusiye tarafından siyasiy sebeplerden taqip etile.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
