Ukraina ve Gürcistan Rusiyeniñ Qara ve Azaq deñizlerinde yapqanlarını Londradaki Halqara deñiz teşkilâtına (HDT) şikâyet etti. Bu aqta Ukrainanıñ Büyük Britaniya elçihanesi bildirdi.
«Ukraina ve Gürcistan eyyetleri HDT aza devletleriniñ diqqatını Qara deñizde, Azaq deñizinde ve Keriç boğazında qıdıruv-qurtaruv tedbirlerine keder etken Rusiyeniñ qanunsız areketlerine celp etti», – dep aytıla haberde.
Qayd etilgenine köre, umumiy vesiqağa Avropa Birligi memleketleri ve ABD eyyetleri qoltuttı.
Keçken sene Avropa Birligi, Kanada ve ABD Rusiyeniñ Keriç boğazında kirsetken inspektsion rejimini ve bu boğaz üzerinden köpür qurucılığı sebebinden olğan gemi keçişi içün manialarını takbih etti.
Bıltır aprelniñ 10-nda Ukraina Keriç boğazında «Rusiye tarafından qanunsız köpür qurucılığı ve açılışı», Azaq deñizde ukrain limanlarına ketken gemilerniñ ayırım teşkerilüvi sebebinden Halqara deñiz teşkilâtına narazılıq bildirdi.
Halqara deñiz teşkilâtı ükümetlerara teşkilât, BM ihtisasiy müessisesi ola. HDT faaliyeti halqara ticaret gemilerine tesir etken ayırım areketleriniñ lâğu etilmesi, deñizde telükesizlik teminlevi normalarınıñ tasdıqlanması ve ilk evelâ deñizlerniñ gemilerden bulaştırıluvınıñ ögüni aluvnen bağlıdır.
2014 senesi iyül ayından itibaren Ukraina ükümeti Rusiye işğal etken yarımadanıñ bütün limanlarınıñ işini resmiy şekilde toqtattı, Qırım limanları halqara gemiler içün qapatıldı.
Keriç boğazındaki köpürniñ maşina qısmı 2018 senesi mayıs ayında yengil maşinalar içün açılğan edi, daa soñra yük maşinalarınıñ areketi başlatıldı. Köpürniñ demiryol qısmı daa azır degil.
Ukrainanıñ beşinci prezidenti Petro Poroşenko Rusiye işğal etken Qırımda Keriç köprüniñ qanunsız qurucılığı Kremlniñ halqara uquqqa emiyet bermegeniniñ daa bir delili ola, dep bildirgen edi.
Avropa Birligi ve ABD Rusiye ve işğal altındaki Qırım arasındaki Keriç köprüniñ qısmen açılışını takbih etti. Ukraina tarafı 2014 senesi Qırım ilhaq etilgen soñ Rusiye ile köpür qurucılığı añlaşmasından çıqtı.
2014 senesi iyül ayında Ukraina ükümeti ilhaq etilgen Qırımdaki bütün limanlarnıñ işini resmiy şekilde toqtatqan edi.
