Ukraina Yuqarı Radasınıñ insan aqları vekâletlisi Lüdmila Denisova Donetsk ve Lugansk vilâyetlerinden Rusiyege 700 biñden çoq vatandaş sakin çıqarıldı, dep bildirdi.
«Rusiye Federatsiyasınıñ malümatına köre, 700 biñden çoq vatandaş rusiyege çıqarıldı, olarnıñ esaplarına köre, 130 biñden çoq bala ola», – dep ayttı Denisova Azatlıq Radiosınıñ yayınında.
Onıñ aytqanına köre, er kün Rusiyege tahminen 20 biñ insan çıqarıla, ukrainalılar Rusiye Federatsiyasınıñ 35 regionında buluna. Ombudsmen, bunı Rusiye insan aqları vekâletlisi Tatyana Moskalkova da tasdıqlay, dep qoştı.
«Şimdi filtratsion lager Donetsk vilâyetinde buluna, anda 10 biñden çoq vatandaşımız bar. Bu filtratsion lagerlerde vatandaşlarımız işbirligine zorlana. Meraqlarını, Ukraina ya da Rusiye Federatsiyasına qoltutqanlarını soraylar. Nizam qaravullarından tanışları barmı dep soraylar, soñra olarnı apiske almaq ve işkencege oğratmaq içün, belki, bu şekilde olarnı yoq etmek içün», – dep qoştı ombudsmen.
Denisova, Rusiyeniñ Penza vilâyetinde dört lager bar, dep tarif etti. Fevral ayında büyük cenk başlamazdan evel anda Donetsk ve Lugansk vilâyetleriniñ işğal etilgen topraqlarınıñ sakinleri çıqarılğan edi.
Ombudsmen Rusiyeniñ ukrainalılarnı çıqarğanını cenk cinayeti dep adlandıra. «Bu Jeneva vatandaş ealisiniñ aqlarına riayet etüv şartnamesiniñ bozuluvı ola», – dep ayttı o.
Denisova, cenk ketkende sürgün etilgen ealini qaytarmağa imkân barmı sualine de cevap berdi: «Qayda qaytaracağımıznı bilsek, belki, olur. Anda çıqarılğan olsalar, mence, evsiz qalğanlar. Ukrainanıñ o qısmı şimdi vaqtınca işğal altında buluna, anda deşetli uruşlar kete, bombardıman yapıla. Mence, olarnı üçünci bir devletke çıqarmaq mümkün, telükesiz bir devlette olmaları, yardım körmeleri içün», – dep ayttı ombudsmen.
Aprelniñ 5-nde Rusiyeniñ BM daimiy vekili Vasiliy Nebenzâ BM Telükesizlik şurasınıñ toplaşuvında çıqışta bulunıp, Rusiye Federatsiyası Ukrainağa ücüm etkeninden berli 600 biñden çoq insan Rusiyege çıqarıldı, 119 biñi bala ola, dep bildirdi.
Vaqtınca işğal etilgen topraqlar meseleleri naziri İrına Vereşçuk Ukraina akimiyeti Qızıl Haç Halqara komitetine muracaat etip, Rusiyeden Mariupolden çıqarılğan bütün Ukraina vatandaşlarınıñ cedvelini bermesini talap etti.
