Ukraina Tış işler naziriniñ birinci muavini Emine Ceppar eki qırımtatar qadınınıñ ve yedi balasınıñ Suriyedeki qaçaqlar lagerinden qaytqanını izaatladı. Onıñ aytqanına köre, ukrainalılar aman-aman üç yıl Suriyeniñ şimaliy-şarqında qapalı qaçaqlar lagerinde «pek zor şaraitlerde» qaldı.
«Niayet, uzun ayırılıqtan soñ tahliye etilgen vatandaşlar tuvğanlarını quçaqlap olur. Qaytqan ukrainalılarğa adiy yaşayışqa alışmaları içün yardım etilecek, Qırımtatar Milliy Meclisiniñ imkânları da qullanılacaq», – dep bildire Cepparnıñ aytqanlarını Ukraina Tış işler nazirliginiñ matbuat hızmeti.
Nazir muavini qayd etkenine köre, Suriyedeki qaçaqlar lagerlerinde ukrainalılar, hususan qırımtatarlar qala.
«Tış işler nazirligi Ukraina Prezidentiniñ ofisi ve diger devlet organlarınen işbirligi yapıp, olarnı Vatanğa qaytarmaq içün ğayret etecek. Qırımtatar Milliy Meclisini de faal sürette celp etecekmiz», – dep bildirdi Emine Ceppar.
Qadınlarnıñ Suriyeden tahliye etilgenini Ukraina prezidenti Volodımır Zelenskıynıñ ofisi de tasdıqladı.
«Yılbaş gecesi Ukraina vatandaşlarını Suriyeden tahliye etmek içün zor bir tedbir keçirildi. Suriyeniñ şimaliy-şarqındaki qaçaqlar lagerinde bulunğan doquz kişi vatanğa qaytarıldı, bunı tuvğanları rica etken edi. Eki qadın ve yedi bala. Olarnı qaytaruv planını Ukraina prezidenti Volodımır Zelenskıy şahsen keliştirip idare etti», – dep aytıla Prezident ofisiniñ matbuat hızmeti haberinde.
Qırım.Aqiqat mühbiri mahsus tedbirlerge celp etilgen Ukraina quvet müessiselerinden biriniñ hadimi bergen malümatqa esaslanıp, eki qırımtatar qadını ve yedi balasınıñ Suriyedeki qaçaqlar lagerinden qaytqanını bildirgen edi.
Bundan evel Qırımtatar Milliy Meclisi ukrainalı qadınlarnıñ Suriyedeki qaçaqlar lagerinden qaytmasına yardım etmege çağırğan edi.
Refat Çubarovnıñ 2019 senesi mart ayında bildirgenine köre, 21 qadın ve 54 bala – Ukraina vatandaşları – Suriyede «viran etilgen infrastrukturalı zor şaraitlerde» buluna ve Ukrainağa qaytmaq içün yardım istey.
Suriyede 2011 senesinden berli vatandaş cenki devam ete, onıñ neticesinde tahminen 400 biñ kişi elâk oldı.
