Ukrainanıñ Türkiye elçihanesi Rusiye zenaatdaşlarınıñ işğal altındaki yarımadada Rusiyeniñ «ğalebeleri» aqqında ikâye etken videosı sebebinden takbih etip, Moskva Gaaga içün delil toplamanmasına yardım ete», dep qayd etti.
Bu aqta elçihanesi Twitter saifesinde bildirdi.
«RF Türkiye Cumhuriyeti elçihanesiniñ Qırımdaki «ğalebeler» aqqında videosı – istegenini kerçek olaraq köstermek ıntıluvıdır. Kerçekni ise aşağıda fotoda körmeñiz mümkün. İnsan ve uquq ceetinden hırsızlamaq – cinayettir. Bunıñnen maqtanmaq – tsinizmniñ üst perdesidir. Moskvanıñ eyforiyası Gaaga içün delil toplamağa yardım ete», – dep aytıla haberde.
Qayd etmek kerek ki, Rusiyeniñ Türkiye elçihanesi derc etken Qırım yarımadasına bağışlanğan videoda «kâr ve yatırımlar arttı, çeşit din ve millet vekillerinen añlaşıla», dep aytıla.
Qırımnıñ Rusiye akimiyeti 2020 senesi Qırım bücet masraflarını 14%-ğa arttırdı, dep bildirgen edi. Yılnıñ ilk dört ayı içinde yarımada bücetke köre kelirni milliard ruble qadar becerip olamadı.
Hatırlatamız, ABD Devlet departamenti 2019 senesi dünyada din serbestligine dair maruzanı derc etti. Anda işğal altındaki Qırım aqqında da aytıla. Qayd etile ki, Rusiye din azlıqları, «İyegova şaatları», Ukraina Ortodoks kilsesi ve qırımtatar musulmanlarını qorquza.
ABD halqara din serbestligi komissiyasınıñ esabatında Rusiye ABD Devlet departamenti «ayrı qasevet doğurğan memleketler» cedveline kirsetecek 14 memleket arasında bar, dep aytıla. Rusiye tarafından işğal etilgen Qırımda din serbestligi aqqınıñ bozuluvı aqqında aytıla.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
