Ukraina, Türkiye ve Rusiye Tış işler nazirleri Dmıtro Kuleba, Mevlüt Çavuşoğlu ve Sergey Lavrov Antalyada muzakereler keçire, dep bildirdi Ukraina Tış işler nazirliginiñ spikeri Oleg Nikolenko.
«Antalyada Ukraina, Türkiye ve Rusiye Federatsiyasınıñ Tış işler nazirleriniñ iştiraki ile Rusiyeniñ Ukrainağa qarşı ücümini toqtatuv muzakereleri başladı», – dep yazdı Nikolenko Twitterde martnıñ 10-nda.
Ukraina Tış işler nazirligi Facebookta bildirgenine köre, Kyiv vaqtınen saat 12:00-da Dmıtro Kuleba muzakerelerniñ neticelerinen bağlı matbuat konferentsiyasını ötkerecek.
Ukraina naziri Lavrov Türkiyege kelse, onen muzakerelerge azır, amma printsipial meselelerde deñişme olmaycaq, dep bildirdi.
«Biz muzakere keçiremiz, amma Ukraina diplomatiyası devletimiz içün iç bir printsipial meselede razı olmaycaq», – dedi o.
Ankara martnıñ 7-nde Ukraina, Rusiye ve Türkiye tış işler nazirleriniñ Antalyada üç taraflı körüşüvini ilân etti. Bu fevralniñ 24-nden Rusiye Ukrainağa ücüm etkeninden berli yüksek seviyeli diplomatlar arasında ilk muzakere olacaq.
NATO azası olğan Türkiyeniñ em Kyivnen, em Rusiyenen sıqı munasebetleri bar, Türkiye Putin fevralniñ 24-nde Ukrainağa ücüm etkenini ilân etken soñ, cenk areketlerini toqtatmağa çağıra.
Ukraina prezidenti ofisiniñ yolbaşçı muavini Mıhaylo Podolâk Kyiv «mesüliyetli bir halqara aracı» istey, çünki Ukraina tarafı «Rusiye Federatsiyasına iç işanmay», dep bildirdi.
Ukraina prezidenti Volodımır Zelenskıy martnıñ 3-nde Türkiye prezidenti Recep Tayyip Erdoğan Rusiye prezidenti Vladimir Putinni Ukrainadaki cenkni toqtatmağa iqna ete bilecek pek az dünya liderlerinden biri ola, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
