Ukraina TİN yolbaşçısınıñ birinci muavini Emine Ceppar Rusiye işğal etken Qırım müzeyleriniñ Felemenkniñ Yuqarı mahkemesiniñ "skit altını"nıñ Ukrainağa qaytarlıması qararına bergen temyiz talabına cevap berdi
"İşğal etilgen Qırım müzeyleri Amsterdam mahkemesiniñ "Skit altını"nıñ Ukrainağa qaytarılması qararına temyiz talabını berdi. Biz Ukrainanıñ noqta-i nazarını ve halqara uquqnı qorumağa devam etermiz. Felemenkniñ Yuqarı mahkemesinde artefaktlar memleketimizniñ olğanını üçünci kere isbatlarmız", - dep yazdı Emine Ceppar.
2016 senesi dekabr ayında Amsterdamnıñ Bölge mahkemesi Qırım müzeyleriniñ eksponatlarını Ukrainağa qaytarmağa qarar berdi. 2017 senesi baarde Rusiye bu qararğa itiraz bildirdi.
2019 senesi martnıñ 11-nde bu dava Amsterdamnıñ İstinaf mahkemesinde diñlenmege başladı.
500-den ziyade müzey eşyasından ibaret «Qırım: altın ve Qara deñizniñ sırları» sergisi 2014 senesi yanvarniñ 19-nda Almaniyanıñ Bonn şeerindeki Reyn ülkeşınaslıq müzeyinde keçirilgen edi. Daa soñra Amsterdamdaki Allard Pierson arheologik müzeyinde açıldı. Sergi 2014 senesi fevralniñ 7-nden avgustnıñ 31-ne qadar devam etti, faqat Rusiyeniñ Qırım işğalinden sebep Qırım müzeylerine qaytıp olamadı.
Qırımnıñ dört müzeyi eksponatlarnıñ qaytarıluvınen bağlı davanı Allard Pierson müzeyine qarşı açtırğan edi. Ukraina akimiyeti artefaktlar müzeylerniñ mülki degil, Ukraina devletine ait, dep bildirdi. Felemenk müzeyi qadı qararı olmağan soñ ya da taraflar añlaşqanına qadar eksponatlarnı bermemege qarar aldı.
