Martnıñ 9-nda, salı künü, Ukraina TİN binasında «Özüne sadıqlıq cinayet degil!» foto sergisi açıldı. Bu foto sergisi işğalden soñ Qırımda qırımtatar ve mülmanlarnıñ Rusiye tarafından zulumğa oğratılması aqqında ikâye ete.
Qırım.Aqiqat mühbiriniñ haber etkenine köre, bu leyhanıñ teşebbüsçisi TİN başınıñ birinci muavini Emine Ceppar olğan.
Foto leyhası, Kremlniñ Qırım mabüsleri balalarınıñ fetoresimleri şeklinde taqdim etilgen. Onıñ merkezinde ukrain ve halqara aq qoruyıcıları siyasiy mabüsler olaraq sayğan tevqif etilgen ve mahküm etilgen Qırım sakinleriniñ balalarınıñ ikâyeleri.
Sergide qırımtatar faalleriniñ balalarınıñ 9 ikâyesi tağdim etilgen.
«Bugün açılğan sergi biz içün pek müimdir. Çünki bizge kelgen er bir çetel musafir, er bir nazir bunı körecek. Bu sene Qırım içün başqa olacaq. Çünki bu sene memleketimiz içün ğayet müim olğan Qırım platforması ötkerilecek. Bunı olar içün yapacaqmız. Bu leyhanıñ qaramanları içün», – dedi Ukraina TİN başı Dmıtro Kuleba serginiñ açılışında.
Ekinci Bağçasaray «Hizb ut-Tahrir davası»nıñ mabüsi Seyran Saliyevniñ apayı Mümine Saliyeva, 2014 senesi «qırımtatar halqınıñ kelecegi sanki toqtadı», dep qayd etti.
«Kütleviy tintüvler ve tevqifler başlandı. Bağçasarayda, qırımtatarlar toplu yaşağan yerde, bir soqaqta siyasiy mabüslerniñ 60 balası yaşay. Bu sergi pek küçük balalarnıñ büyük keri aqqındadır. Er birisiniñ ciddiy ruhiy yarası bar», – dedi Saliyeva.
Tedbirde qırımtatar halqı lideri Mustafa Cemilev, Milliy Meclis reisi Refat Çubarov, Meclis azası, sabıq siyasiy mabüs İlmi Ümerov, jurnalist, Qırımnı mecburen terk etken Qırım.Aqiqat müellifi Mıkola Semena, «Qırım evi»niñ başı Ahtem Seitablev ve digerleri iştirak etti.
