Ukraina TİN Rusiyeden quvulğan Avropa diplomatlarına birdemlik bildire.
“Ukraina TİN, Rusiye uydurılğan sebeplerden quvğan AFC, İsveçiya ve Poloniya diplomatlarına birdemlik bildire. RF-nıñ qararı Viyana şartnamesine zıt kele ve Rusiyeniñ halqara uquqqa köre mecburiyetlerini kene qaba şekilde boza”, – dep yazdı nazirlik Twitterde.
Evel haber etilgeni kibi, Rusiye Avropa Birliginiñ üç diplomatını persona non grata, dep ilân etti. Yanvarnıñ 23-nde narazılıq aktsiyalarda iştirak etkenleri içün olarğa narazalıq bildirildi. Olar eñ yaqın vaqıtta RF territriyasını terk etmek kerekler.
Şimdiki vaqıtta Moskvada Avropa Birliginiñ Tış işler ve telükesizlik siyasetinden Yuqarı temsilcisi, Avropa komissiyasınıñ vitse-prezidenti Josep Borrell bulunmaqta. Rusiye Tış işler naziri Sergey Lavrov ile laf etkende o, Minsk añlaşmalarınıñ tam şekilde amelge keçirilmesini talap etti.
Evel, Avropa Birliginiñ Tışı işler ve telükesizlik siyasetinden Yuqarı temsilcisi, Avropa komissiyasınıñ vitse-prezidenti Josep Borrell, Avropa Birligi ve Rusiye arasında munasebetler soñki on yıl içinde fenalaştı, Qırım işğal etilgen soñ ise daa ziyade muşkulleşti, dep bildirgen edi.
Fevralnıñ 2-nde, Josep Borrell Rusiyege ziyareti arfesinde Ukraina TİN başı Dmıtro Kuleba ile telefonnen laf etken edi.
