Ukraina Tış işler naziriniñ birinci muavini Emine Ceppar eki qırımtatar qadınnıñ ve olarnıñ 7 balasınıñ Suriyedeki qaçaqlar lagerinden çıqarılmasını tevsir etti. Onıñ bildirgenine köre, ukrainler ukrainler Suriyeniñ şimal-şarqındaki qaçaqlar içün qapalı legerlerde “ğayet qıyın şaraitte” aman-aman üç yıl keçirgenler.
“Niayet, devamlı ayırılıqtan soñ tahliye etilgen vatandaşlar tuvğanlarını quçaqlap olacaqlar. Qaytqanlarğa yardım kösterilecek, Meclis de bunda iştirake tecek”, – Cepparnıñ aytqanlarından alıntı ketire TİN matbuat hızmeti.
Aynı zamanda, onıñ bildirgenine köre, Suriyede qaçaqlar lagerlerinde ukrainler, şu cümleden qırımtatarlar da alâ dav qalmaqtalar.
"Tış işler nazirligi Prezident ofisi ve diger devlet organlar ile işbirlikte bu adamlarnı Vatanına qaytarmaq içün elinden kelgenini yapacaq. Qırımtatar Milliy Meclisini de faal cel etecekmiz", - dedi o.
Qadınlarnıñ Suriyeden tahliye etilüvini Ukraina Prezidentiniñ ofisinde de tasdıqladılar.
"Suriyedeki qçaqlar lagerinde tutulğan 9 ukrain vatandaşı Vatanına qayttı. Bu eki qadın ve yedi bala. Olarnıñ qaytarıluv planını şahsen prezident Volodımır Zelenskıy ile kelişilgen ve koordinatsiya etilgen edi", - yazıla bildirmede.
Ukraina akimiyeti eki qırımtatar qadınını ve 7 balasını Suriyeniñ şimaliy-şarqında bulunğan ve Suriye demokratik quvetleriniñ memuriyeti kontrolindeki Roj qaçaqlar lagerinden aldı. Bu aqta mahsus tedbirlerde iştirak etken, amma resmiy izaat berip olamağan Ukraina quvet müessiselerinden biriniñ hadimi Qırım.Aqiqat mühbirine bildirdi.
Bundan evel Qırımtatar Milliy Meclisi ukrainalı qadınlarnıñ Suriyedeki qaçaqlar lagerinden qaytmasına yardım etmege çağırğan edi.
Refat Çubarovnıñ 2019 senesi mart ayında bildirgenine köre, 21 qadın ve 54 bala – Ukraina vatandaşları – Suriyede «viran etilgen infrastrukturalı zor şaraitlerde» buluna ve Ukrainağa qaytmaq içün yardım istey.
Suriyede 2011 senesinden berli vatandaş cenki devam ete, onıñ neticesinde tahminen 400 biñ kişi elâk oldı.
