Ukraina TİN qatiy narazılıq bildirip, Rusiye Federatsiyasınıñ Devlet Dumasına saylavlar içün Qırım ve Aqyarda rey berüvniñ keçirilmesini takbih etti. Bunıñ aqqında nazirlikniñ beyanatında yazıla.
«Qanunsız saylavlarnıñ teşkil etilmesini ve keçirilmesini Rusiyeniñ Ukrainanıñ devlet suvereniteti ve topraq bütünliginiñ qaba şekilde bozulmasınıñ devamı kibi sayamız», – dep yazıla beyanatta.
Bu saylavlarda iştirak etken ve onıñ keçirilmesine alâqası odğan er kes Ukraina qanunlarına köre mesüliyetke celp etilcek, dep qayd etile.
«Çetel devletlerni ve halqara teşkilâtlarnı Rusiyeniñ qanunsız areketlerini qatiy şekilde takbih etmege, Ukrainanıñ muvaqqat işğal etilgen topraqlarında saylavlarnıñ neticeleriniñ tanımamasını ve bu şekilde yaratılğan Rusiye Devlet Dumasınıñ qanunsızlığını açıq şekilde bildirmege, RF-na siyasiy-diplomatik tazyıqnı quvetleştirmege çağıramız», – dep yazıla beyanatta.
Bundan ğayrı Ukraina diplomatları Rusiyeden Qırım MC ve Aqyar şeeriniñ, Lugansk ve Donetsk vilâyetleriniñ qısmılarınıñ işğalini toqtatmağa ve öz mecburiyetlerine riayet etmege çağıra.
Sentâbrniñ 17-nde Rusiye Devlet Dumasına saylavlar başlandı. Olar üç kün devam etecek.
