Kyiv, Rusiyenen "yaqın vaqıtta" kelecek esirler almaşuvını yapmağa niyetlene. Bunı Ukraina Tış İşler naziri Vadım Prıstayko "İnter" telekanalınıñ efirinde ayttı.
"Er kesni er keske almaştırmaq içün parallel iş yapıla. Bu er vaqıt qıyın protsess edi, çünki "er kesni er keske", bu demek – biz cedvellerni bilemiz, bu cedvellerge razı olamız... Mahsus gruppalar, bu pek qıyın esnasnı başlamaq ve uyğulamaq içün er kün gece-kündüz çalışa. Amma biz, yigitlerimizni yaqın vaqıtta azat etmege niyetlenemiz", – dedi Prıstayko.
Bundan evel Rusiyede daa 113 Ukraina vatandaşı tutula, olarnıñ 89-ı - qırımtatarlar, dep bildirile edi.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı. Oleğ Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Ukraina prezidenti Volodımır Zelenskıy ukrainalılarnı ava limanında qarşıladı. O, Qırım.Aqiqatqa izaat berip, Rusiyede apiste tutulğan qırımtatar faalleriniñ azat etilüvi Ukraina-Rusiye almaşuvınıñ ekinci basamağı olacaq.
Qırımtatar Milliy Meclis reisi Refat Çubarov, Rusiye, "ukrain siyasiy mabüsleriniñ azat etilmesi aqqında muzakereler etilgende", ilhaq etilgen Qırım mavzusınen bağlı bütün laflarnı kestirmege tırışa, dep tüşüne.
