Ukraina Tış İşler Nazirligi iyül 30-ında, Büyük Britaniyalı Alex King Twitter qullanıcısı başlağan "Qırım - bu Ukraina" kampaniyasına qol tutmağa çağırttı. O Glasnost Gone saifesini alıp bara.
"İyülniñ 30-ı - #CrimeaIsUkraine kampaniyasınıñ künüdir. Epimiz içün bu heştegni qullanmaq, Rusiyeniñ ücümini ve Qırım yarımadasınıñ 6 yıllıq işğalini aydınlatmaq imkânıdır", - denile beyanatta.
Ukraina TİN-niñ spikeri Katerına Zelenko ise Twitterde bu kampaniyağa qol tutmağa çağırttı.
"Qırım işğaliniñ 6-ncı yılını aydınlatmaq ve bunıñ aqqında fikriñizni bildirmek içün, iyülniñ 30-ında #CrimeaIsUkraine heştegini qullanıp, bu yahşı teşebbüske qol tutmağa çağırtamız", - yazdı Zelenko.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
