Ukraina TİN başı Dmıtro Kuleba, Ukraina ve Rusiye prezidentleriniñ körüşüvi Donbas ve işğal etilgen Qırım meseleleri muzakere etilgen taqdirde ola bile, dep ayttı.
Bunı ukrain naziri, Ukraina ve Rusiye prezidetleri arasında ola bilecek körüşvniñ azırlanmasını tefsir etip, Radio NV yaynında bildirdi.
«İstegenimizni açıq şekilde seslendirdik, olar da istegenlerini seslendirdi. Bu körüşüv ile bağlı ciddiy bir-birine zıt kelgen yanaşmalar bar, amma olarnen aytışmağa devam etecekmiz ve bu mevamlarnı yaqınlaştırmağa tırışacaqmız çünki Rusiyede er şey Vladimir Putinniñ qararı ile ola ve körüşmek onen kerek. Putinnen Qırım ve Donbas aqqında laf etmemek içün körüşmeycekmiz», – dedi Kuleba.
Mayısnıñ 20-nde Volodımır Zelenskıy, Rusiye ve Ukraina eki prezidetniñ körüşüvini teşkil etmek içün aytışqanını bildirdi.
Aprelniñ 26-nda brifing vaqtında Volodımır Zelenskıy, Rusiye prezidenti Vladimir Putin ile körüşüvi olacağına oşay, dep bildirgen edi. O, Prezident ofisiniñ reberi Andriy Yermakqa bu hususta aytışmağa buyurğan.
Aprelniñ 20-nde Zelenskıy içtimaiy ağlarda videorolik yayınlap, Rusiye prezidenti Vladimir Putinge cenk ketken Donbasnıñ er angi noqtasında körüşmege teklif etti. Vladimir Putin ise cevap olaraq Ukraina devlet başı ile eki taraflı munasebetlerni muzakere etmege azır olğanını bildirdi.
