Ukraina Tış işler nazirligi ABD elçiligine, Apple-nıñ Qırımnıñ ne içün Rusiyeniñ bir qısmı olaraq haritada tasvir etkenini soraştırıp bilmege buyurdı, dep haber etti Ukraina TİN spikeri Oleg Nikolenko.
"Tış işler nazirligi artıq Ukrainanıñ ABD-deki elçiligine bu vaziyetni al etmek içün Apple şirketi ile bağlanmağa buyurdı. BMT Baş Assambleyasınıñ qararları açıq şekilde bütün taraflardan Qırımnıñ Ukraina toprağınıñ ayırılmaz bir parçası olaraq statusınıñ şübe altına ala bilecek areketlerden uzaq turmasını talap ete", - dedi Nikolenko Azatlıq Radiosına.
Apple Amerika şirketi öz haritasında Qırımnı Rusiye qısmı olaraq köstergenine Instagram-da Culture Ukraine diqqat etti. Söz Apple Music aqqındadır. Anda Ukraian Qırımsız tasvir etilgen. Bunıñ yerine Qırım Rusiye qısmı kibi kösterilgen.
