Ukraina telükesizlik hızmetiniñ martnıñ 22-nde bildirgenine köre, onıñ hadimleri «kritik infrastruktura obyektleriniñ qarşı istihbaratını teminlevinen bağlı tedbir alğanda» Harkivniñ metrosında yapılacaq olğan terror aktınıñ aldını aldı.
«Mahsus tedbir Harkiv vilâyetindeki Ukraina Telükesizlik hızmetiniñ idaresi ve Harkiv vilâyetindeki prokuratura reberliginiñ iqtisadiyat telükesizligi saasında devlet menfaatlarınıñ qarşı istihbarat imayesiniñ idaresi tarafından keçirildi. Ukraina telükesizlik hızmetiniñ hadimleri elde etken malümatqa köre, Rusiye mahsus hızmetleri Harkiv sakinini metro stantsiyalarından birinde teraktnı teşkil etmesi ve kerçekleştirmesi içün celp etti. Reberlerniñ istegine köre, patlavnıñ neticesi çoq sayıda insannıñ ölmesi ve prezident saylavları arfesinde memleketteki cemaat-siyasiy vaziyetniñ kerginleşmesi olacaq edi», – dep aytıla haberde.
Qayd etkenine köre, Ukraina Ceza kodeksiniñ 258-inci maddesiniñ 15-inci qısmı 2-nci noqtasına istinaden açılğan cinaiy tahqiqat çerçivesinde SBU hadimleri Rusiye mahsus hızmetleriniñ vekilleri icracığa cep telefonından işletilgen 600 gramm trotil küçünde patlayıcı bergenini ögrendi. Olar terakt kerçekleştirilmesinen bağlı teşkiliy tedbirlerniñ talimatını berip, cinayet içün on beş biñ ABD dollarını töledi.
«Alınğan malümatqa köre, cinayetçi Harkivde mıh, şurup, bolt ve gaykalarnı satın aldı, olarnı patlayıcığa qoyıp, patlav küçüni ve yaralanğanlarnıñ sayısını arttıracaq edi. Ukraina mahsus hızmetleri tedbir alıp, vatandaşlarnıñ ayatı ve sağlığı içün bir telüke olmasına yol bermedi. Mahkemeden evelki tahqiqat çerçivesinde SBU hadimleri cinayetçiniñ saqlama yerinde patlayıcı yerine «mulâj» qoydı», – dep aytıla haberde.
Erkek Ukraina Ceza-protsessual kodeksiniñ 208-inci maddesine istinaden insanlar toplaşqan «İndustrialnaya» metro stantsiyasında patlayıcı cihaznı qoyğan soñ yaqalandı, dep bildire mahsus hızmetler. Oña terror aktınıñ kerçekleştirilmesinden şübheli sayılğanı bildirildi. Mahkemeden evel tahqiqat devam ete.
